Ma’lumotlaringiz qanday ishlatiladi

Pilot arizalari

Rasmiy saytdagi shakl orqali ism, telefon, tashkilot, hudud, kamera soni va ixtiyoriy izoh olinadi. Bu ma’lumotlar faqat ariza bo‘yicha bog‘lanish, texnik audit va xizmat taklifini tayyorlash uchun ishlatiladi.

Saqlash va kirish

Arizalar Chaqimchi Cloud admin bazasida saqlanadi va faqat vakolatli operator admin kaliti orqali ko‘radi. Yopilgan arizalarni operator boshqaradi. Ariza ma’lumotlari eng ko‘pi bilan 12 oy saqlanadi; so‘rov bo‘yicha istalgan payt o‘chiriladi.

Video ma’lumotlar

Uzluksiz video NVR’da qoladi. Qurilma do‘konda lokal tahlil qiladi; cloudga hodisa metadata’si va siyosat ruxsat bergan snapshot yoki qisqa klip yuborilishi mumkin.

Mijoz demografiyasi (jins va yosh)

Biznes tarifida do‘konga kirgan mijozning taxminiy yoshi va jinsi baholanadi. Baho do‘kondagi kompyuterda, kirish chizig‘i kesilgan paytda bir marta chiqariladi. Cloudga faqat ikki qiymat — «ayol/erkak» va taxminiy yosh — kirish hodisasiga qo‘shilib boradi. Bu baho uchun yuz rasmi saqlanmaydi va yuborilmaydi, yuz namunasi (embedding) olinmaydi va mijozning kimligi aniqlanmaydi. Mijoz avval kelgan-kelmaganini sanash — alohida, ixtiyoriy funksiya (quyidagi «Takroriy tashrif hisobi» bo‘limi). Hisobotda faqat guruh statistikasi ko‘rinadi (<18, 18-30, 31-45, 46-60, 60+); yosh — taxminiy baho, aniq yosh emas. Xodimlar bu statistikaga kirmaydi. Ma’lumot boshqa hodisalar bilan bir xil muddat saqlanadi. Do‘kon eshigiga osish uchun tayyor eslatma: kuzatuv eslatmasi.

Takroriy tashrif hisobi (ixtiyoriy, pilot)

Faqat Biznes tarifida, standart holatda o‘chiq. Uni do‘kon egasi panelda o‘zi yoqadi va kirish eshigiga bu haqda e’lon osilganini tasdiqlaydi; funksiyaga avval biz do‘kon bilan kelishib ruxsat beramiz. Yoqilganda do‘kondagi kompyuter kirish kamerasida ko‘ringan yuzdan raqamli iz (sonlar qatori) hisoblaydi va uni avvalgi izlar bilan solishtirib, bu odam oxirgi 30 kun ichida kelgan-kelmaganini sanaydi. Iz faqat do‘kondagi kompyuterda saqlanadi va cloudga ham, boshqa joyga ham yuborilmaydi; unga ism, telefon, rasm yoki boshqa ma’lumot bog‘lanmaydi va mijozning kimligi aniqlanmaydi. Yuz rasmi saqlanmaydi. Iz oxirgi marta ko‘rilganidan 30 kun o‘tgach avtomatik o‘chiriladi. Cloudga va do‘kon egasiga faqat umumiy sonlar boradi: kuniga nechta yangi va nechta qaytgan tashrif bo‘lgani va mijozlar necha kunda qaytgani. Panelda odam kartasi, rasm va qidiruv yo‘q. Hisob taxminiy: bitta odam ikki marta «yangi» sanalishi yoki ikki odam bitta deb qo‘shilishi mumkin. Iz ism yoki rasmga bog‘lanmagani uchun uni alohida odam bo‘yicha topib bo‘lmaydi; savol yoki e’tiroz bo‘lsa, do‘kon e’lonidagi mas’ul shaxsga yoki bizga (aloqa sahifasi) murojaat qiling. Yuzdan olingan raqamli iz qonunchilikda biometrik ma’lumot sanalishi mumkin — funksiyani yoqishdan oldin buni yuristingiz bilan ko‘rib chiqing.

Davomat biometrikasi

Xodim davomati (Face ID) — pilot bosqichidagi funksiya, faqat Biznes tarifida: uni har bir do‘kon uchun biz alohida yoqamiz va u faqat yozma rozilik bergan xodimlar uchun ishlaydi. Rozilik hujjatining versiyasi va imzolangan sanasi panelda qayd etiladi (rozilik shabloni). Davomat kamerasidan olingan yuz kadri cloudga — Yevropadagi serverimizga — yuboriladi va u yerda xodim namunasi bilan solishtiriladi. Kamera oldidan o‘tgan boshqa odamlarning yuz kadri ham solishtirish uchun cloudga boradi: ular xodimlar ro‘yxatida yo‘q, shuning uchun tanilmaydi va ulardan namuna saqlanmaydi. Yuz embedding’lari cloudda shifrlangan holda saqlanadi (kalit bazadan alohida); yuz kadrlari ko‘pi bilan 48 soat saqlanib avtomatik o‘chiriladi. Oddiy jonlilik tekshiruvi telefon ekrani yoki qog‘ozdagi rasmga o‘xshagan qaydni «shubhali» deb belgilaydi va uni ish vaqtiga qo‘shmaydi. Bu tekshiruv mukammal emas: uni aldash mumkin, haqiqiy xodim ham ba’zan «shubhali» bo‘lib qolishi mumkin. Shuning uchun davomat ma’lumoti do‘kon egasi uchun ma’lumot, xodimni jazolash uchun yagona asos emas. Xodim ro‘yxatdan chiqarilganda uning namunalari o‘chiriladi; xodim so‘rovi bo‘yicha ham istalgan payt o‘chiriladi.

Ma’lumot qayerda saqlanadi

Chaqimchi Cloud serverlari Yevropada joylashgan (Germaniya kompaniyasining Fransiyadagi ma’lumot markazi). Hodisa statistikasi, snapshot va qisqa kliplar, shuningdek davomat biometrikasi (xodimlarning yuz namunalari va yuz kadrlari) o‘sha yerda — O‘zbekistondan tashqarida saqlanadi. Uzluksiz video arxiv va takroriy tashrif izlari bunga kirmaydi — video sizning NVR va kompyuteringizda, izlar esa do‘kondagi kompyuterda qoladi va hech qayerga chiqmaydi. Ta’lim muassasasi yoki biometrik ma’lumot bilan ishlashdan oldin buni yuristingiz bilan ko‘rib chiqing; kerak bo‘lsa Face ID modulini umuman yoqmaslik mumkin.

Uchinchi tomon xizmatlari

Panel ichidagi «AI yordamchi» so‘rov berganingizda hodisa kadrini tahlil uchun Google Gemini xizmatiga yuboradi — ya’ni o‘sha kadr Google serverlarida qayta ishlanadi. Bu faqat siz savol berganingizda va faqat o‘sha hodisa uchun sodir bo‘ladi. Yuz kadrlari va xodim davomati rasmlari bu xizmatga hech qachon yuborilmaydi, so‘rovda esa yosh, jins yoki shaxsni taxmin qilish taqiqlangan. Telegram xabarlari Telegram orqali yetkaziladi. Boshqa uchinchi tomon tahlil yoki reklama xizmatlaridan foydalanilmaydi.

Rozilik

Ariza yuborish bilan faqat ko‘rsatilgan aloqa maqsadida bog‘lanishga rozilik berasiz. Ma’lumotlaringizni o‘chirishni so‘rash yoki savol berish uchun aloqa sahifasiga o‘ting.